चितवन, ८ भदौ । चितवनमा स्क्रब टाइफस संक्रमण तीव्र गतिमा फैलिएको छ। आइतबार बर्दघाट नगरपालिका–१३ की ३६ वर्षीया महिलाको भरतपुर अस्पतालमा उपचारका क्रममा मृत्यु भएको छ। भदौ ४ गते अस्पताल भर्ना भएकी उनी छारे रोगबाट समेत पीडित थिइन्। अस्पतालका प्रवक्ता डा. रामप्रसाद सापकोटाका अनुसार अवस्था गम्भीर बन्दै गएपछि बचाउन सकिएन।
यस्तै, चितवनका जनस्वास्थ्य कार्यालय प्रमुख दिनेश रुपाखेतीका अनुसार हालसम्म एक हजार ५३० जनाको परीक्षण गरिएकोमा ७३ जनामा संक्रमण पुष्टि भएको छ। संक्रमितमध्ये ५८ जना चितवन जिल्लाका रहेका छन्।
स्क्रब टाइफसलाई स्थानीय भाषामा ‘जंगली ज्वरो’ पनि भनिन्छ। यो रोग ओरिएन्टिया त्सुत्सुगामुशी नामक जीवाणुबाट हुन्छ, जुन झारझुरुम्मा पाइने ‘चिगर’ नामक किराको टोकाइबाट मानिसमा सर्ने गर्दछ। यसका लक्षणमा अचानक ज्वरो आउनु, टाउको दुखाइ, शरीरमा र्यास आउनु, लिम्फ नोड सुन्निनु, वाकवाकी र शरीरमा घाउ देखिनु प्रमुख मानिन्छ।
रोग नियन्त्रणका लागि जनस्वास्थ्य कार्यालयले अस्पतालहरूमा परीक्षण र उपचारको सुविधा विस्तार गरेको छ। साथै, सरसफाइमा ध्यान दिन, झारझुरुम्मा बस्दा सावधानी अपनाउन, घाँसदाउरा तथा खेतबारीमा काम गर्दा पूरा शरीर ढाक्ने लुगा लगाउन स्वास्थ्यकर्मीहरूले आग्रह गरेका छन्।
